25 آڪٽوبر 1917ع ۾ روس منجهه آيل بالشويڪ يا ”عظيم آڪٽوبر ڪميونسٽ انقلاب“ ڪميونسٽ اڳواڻ ولادي مير لينن (1924ع -1870ع)۽ سندس ساٿين جي اڳواڻيءَ ۾ برپا ٿيو. اِن انقلاب کي روس جي ٻين سياسي حلقن دل سان قبول نه ڪيو، جنهنڪري 1917ع کان 1922ع تائين ملڪ ۾ گهرو لڙائي هلندي رهي. ان لڙائيءَ جو خاتمو 1922ع ۾ سوويت يونين جي وجود ۾ اچڻ سان ٿيو. پهرين عالمي جنگ دوران روس معاشي طور تي تباهه ٿي چڪو هو، جنهن ڪري فوج ۽ عوام سميت هر طبقو تڏهوڪي روسي شهنشاهه نڪولس ٻئي جي حڪومت ۽ وزير اعظم ڪيرنسڪي منجهان سخت بيزار هو. روس جي ڪميونسٽن انهيءَ بحُراني صورتحال جو فائدو وٺندي، جرمن مُفڪر ڪارل مارڪس جي فڪر منجهان اخذ ڪيل سياسي نظام پُرتشدد انقلاب ذريعي پهريون دفعو دنيا جي هڪ علائقي اندر لاڳو ڪيو. بالشويڪ خود ڪميونسٽ پارٽيءَ جو اهو گروهه هو، جيڪو جمهوري تبديليءَ بدران پرتشدد طريقي سان انقلاب آڻڻ جو حامي هو. انقلاب کانپوءِ ولادي مير لينن ڪميونسٽ حڪومت جو سربراهه ٿيو ۽ سندس اڻٿڪ ڪوششن سان تباهه حال روس دنيا جي عظيم سياسي ۽ فوجي طاقت بڻجي اُڀريو. جيئن ته لينن جو لاڳاپو به ڪميونسٽ پارٽيءَ جي بالشويڪ گروپ سان هو، تنهڪري آندل انقلاب مٿان به اهو نالو مشهور ٿيو